ديوان بيكيا
للشاعر المصرى سيد الموجى
سضم خمسة وعشرين قصيدة
من أشهرها قصيدة قرقر التى تحكى مأساة عربجى فقد حماره
الغلاف والرسوم الداخلية للفنان : أسامة عمران
صدر الديوان عام 1977 م
رقم الايداع 2335 لسنة 1977 م ؛
من أشهر قصائد هذا الديوان
قُرقُر
حا يا قُرقُر كُلها ساعتين ونوصل شد حيلك
دا انت طول عمرك يا قرقر راضى ويايا بقليلك
يبقى ليه جىّ النهارده تتقمص وتهز ديلك ؟
جر عَرَبيتك و ياللا والا يعنى عايزنى اشيلك؟!
حا يا قرقر متناكفنيش جرى ايه يا ابن الحلال
دنا مفطرتش يا قرقر وانت معلوف علفه عال
يبقى هل يرضيك كده نعطل ومناخُدش المشال
طب واجيب اكلك منين ، طب واقول ايه لما نرجع للعيال ؟
حا يا قرقر دا انت عارف كل حاجة عن حياتى
دا انا بحكيلك حاجات يمكن متعرفهاش مراتى
دا احنا ع الحلوة وع المرة سَوَى سارحين يوماتى
برضة واقف ؟ برضة هاتسبنى كدا لوحدى أهاتى؟!
حا يا قرقر عيب عليك عطلتنا دى ، اخزى الشيطان
واما نرجع لك على هازوِّد المعلوم حفان
عارف انك م التعب هلكان وعيّان من زمان
بس مش معنى كدا تسيبنى ارغى زى البغبغان !
برضة واقف ، طب ورحمة امى وعليَّ الطلاق
بالتلاتة من مراتى ، تلاتة بالله العظيم
هاسحب الكرباج ماخلِّى شبر من جسمك سليم
و المثل بيقول يا قرقر اتقى شر الحليم
برضة واقف ، لسة واقف يعنى مش ناوى تطاوعنى
طب يا قرقر, خد يا قرقر .......................
يعنى و مشيت مستقيم !
عمرى اقول عنك كدا هاتعيش بهيم و تموت بهيم
قرقر ! انت زعلت منى طب خلاص حقك علىَّ
ما انت بتخلينى افرغ فيك همومى المتدارية
و انت عارف ان اللى زى حالاتنا احنا الأرزقية
لو عطلنا نجوع ، نموت ، لا لنا معاش و لا حتى ديَّة!
يبقى ليه تسيبنى كدا قُدَّام حمير الناس اهينك
أو تخلى الناس تقول انى أنا مش مالى عينك
بس والعشرة يا قرقر بابقى حزنان حزن ياما
لما اشوف عرقك بيجرى وانت تعبان فوق جبينك
بس هاعمل ايه أدينى باقول في سرى الله يعينك
الحياة صعبة يا قرقر واحنا في الدنيا ضحية
لما كرباجى بيهرى جتتك في اللحظة دية
اوعى تفتكر ان دى منى شطارة وعنجهية
اللى فيك من هم عيشتك والله اكتر منه فيَّ
زى كرابيجنا احنا مابتسلخ جلودكو انتو الحمير
الزمان كرباج يا قرقر فوق ضهور العربجية!!
لقمة العيش مرة زى الصبر يا قرقر يا اخويا
وانت عارف انك انت كل ما ورثت من ابويا
كان بـِوِدِّى تكون طوالتك فيها أحسن صنف فول !
كان بودى كل ما تتمنى يا قرقر تنول
و انت عارف كل حاجة ع العموم من غير ما اقول
المهم الوقتى نوصل بالبضاعة في سلام
لجل نرجع بعشانا قبل ما الاولاد تنام
ساقية دايرة و احنا فيها مربوطين على الدوام
................ أما الّف سيجارة أصل دماغى لفت م الكلام !!
اللهْ ! داحنا خلاص يا قرقر جينا عند المزلقان
و احنا دايما موعودين بالركنة في هذا المكان
واللى جاى ع البعد تعرف ايه كمان ؟! قطر البضاعة
يعنى لو معدناشى فيها ركنة بالقليلة نص ساعة
طبعا المفروض بقى تعدى بسرعة المزلقان
بالسلامة ، شد حيلك ، هيلا ، ياللا القطر بان
ليه كده اتكعبلت ليه استر يا ساتر الله حىّ
شيلوا و يايا يا خلق يا ناس ياهوه ، القطر جىّ !!!
..................
..................
بابكى ليه ؟ بعد اللى صابنى بتسألونى بابكى ليه
هو فيه في الدنيا شئ غير الحمار ابكى عليه ؟!
طب يا ريت القطر كان خطّى على رقبتى أنا
كان عيالى هيحزنولهم شهر أو حتى سنة
بس كانوا هيلقوا لقتهم ويتاووا في دار
العيال ممكن يعيشوا بالحمار من غيرى انا
بس مش ممكن يعيشوا بىَّ من غير الحمار!!!